Kvöldskólar í þorpum Dalíta

Dalítaþorpin á Indlandi eru yfirleitt lítil, afskekkt og gríðarlega fátæk. Dalítar eru stéttleysingjar sem eru lægst settir allra íbúa Indlands. Stéttleysingjar eru um 15-20% landsmanna og eiga sér litla von um betra líf nema með menntun.

Þeir búa gjarnan í moldarkofum með stráþökum, án rennandi vatns, salernisaðstöðu og rafmagns. Vatn er oft tekið úr nálægum stöðuvötnun og getur þurft að ganga langa leið til að sækja það.

Í þorpunum eru yfirleitt ríkisreknir skólar en mjög oft þurfa foreldrarnir að láta börnin vinna fyrir lífsnauðsynjum fjölskyldunnar í stað þess að senda þau í skóla. Einnig hafa þeir ekki efni á að kaupa nauðsynleg skólagögn.

ABC barnahjálp hefur nú stofnað svokallaða kvöldskóla í 20 þessara þorpa. Í gegnum fósturforeldrakerfið getum við styrkt foreldra til að senda börnin sín í skóla. Fjölskyldurnar fá þá styrk til þess að kaupa skólagögn, mat, hreinlætisvörur og ábreiður. Þessi styrkur er um það bil 1/3 af heildartekjum fjölskyldunnar.

Börnin fá einnig hjálp með heimavinnu frá kennara í 2ja tíma "kvöldskóla" í þorpskirkjunni eða undir berum himni og þar fá þau einnig hressingu. Þetta hefur orðið til þess að fjöldi barna þarf ekki lengur að vinna heldur fær tækifæri til að ganga í skóla.

Markmið ABC barnahjálpar er að stofna kvöldskóla með samskonar stuðningskerfi í allt að 200 Dalítaþorpum.