Kenýa

Kenýa

Haustið 2006 hóf ABC barnahjálp hjálparstarf í Naíróbí og þar er rekinn grunnskóli og framhaldsskóli sem heitir Star of Hope. Hann er staðsettur í fátækrahverfinu Mathare.

ABC í Naíróbí 

Haustið 2006 hóf ABC barnahjálp hjálparstarf í Naíróbí. Rekinn er grunnskóli og framhaldsskóli  fyrir bæði dagskólabörn og heimavistarbörn sem staðsettur er í fátækrahverfinu Mathare. Skólinn kallast Star of Hope og eru nemendur um 280 talsins. Þar af búa um 110 börn og unglingar á vistinni.  Meirihluti  heimavistarbarnanna  eru  fyrrverandi götubörn  sem  hafa  náð  undraverðum  árangri  frá fyrra líferni og stunda námið af kappi.

Sér í lagi má nefna frábæran árangur ljóðahópsins í skólanum en árlega tekur hann þátt í hljómlistarhátíð sem nefnist Kenya Music Festivals. Árið 2016 fór hópurinn alla leið í úrslit en keppnin er á landsvísu og komast þarf í gegnum margar forkeppnir áður en keppt er til úrslita. Lokakeppninni er svo skipt í nokkra áfanga og sigraði hópurinn í einni greininni með flutning á frumsömdu ljóði.

Hjá ABC í Kenýa starfar þéttur hópur frábærra starfsmanna og kennara sem sjá til þess að starfið gangi vel og að börnin njóti ástar og umhyggju og fái þá þjónustu sem þeim ber.

Skólaárið í Kenýa hefst í janúar. Hvert skólaár skiptist niður í þrjár annir og taka börnin próf eftir hverja önn: fyrsta önn er frá janúar til mars, önnnur önn í maí til júlí og þriðja frá byrjun september fram í miðjan nóvember.

  • Leikskóladeild fyrir 3ja til 5 ára börn.
  • Grunnskóli fyrir 1. til 8. bekk. Í lok 8. bekkjar taka börnin samræmt próf.
  • Framhaldsskóli sem skiptist í Form 1 – Form 4 með lokaprófi sem gefur réttindi til að fara í háskóla.

Fátækar fjölskyldur geta sótt um pláss fyrir börnin sín í ABC skólunum. Félagsráðgjafar og starfsfólk ABC ræða við foreldrana og taka skýrslur af börnunum. Oft eru fjölskyldurnar líka heimsóttar til að sannreyna að ástandið sé slæmt. Þau sem verst er ástatt fyrir eru tekin inn í stuðningsbarnakerfið.

ABC í Namelok

Árið 2011 setti ABC barnahjálp í Kenýa á fót skóla á svæði Maasai fólksins sem kallast ABC Complex School. Maasaiar búa við rætur hæsta fjalls Afríku, Kilimanjaro.

Skólinn er í litlu þorpi sem heitir Namelok. Fátæktin er mikil og skólinn er kærkominn þar sem ekki er pláss fyrir fjölda barna í ríkisreknum skólum á svæðinu.

Fjöldi nemenda býr í heimavist og  tvær nýjar byggingar voru vígðar snemma árs 2017 og öll aðstaða, bæði fyrir stúlkur og drengi, er til fyrirmyndar og aðstaða til lærdóms mjög góð. Einnig voru nýlega teknar í notkun tvær nýjar skólastofur en þær og heimavistirnar voru fjármagnaðar að stórum hluta í hinni árlegu söfnun ABC barnahjálpar, „Börn hjápa börnum.“

Boðið er upp á grunn- og framhaldsskólanám. Innfæddir sjá um daglegan rekstur og virkt foreldrafélag lætur sig varða alla þætti er snúa að menntun barnanna.

Maasaiarnir hafa verið hirðingjar í margar aldir og lifa lífinu án þess að nýta sér margt sem við köllum nútímaþægindi. Húsin þeirra eru kofar gerðir úr bambus og kúamykju með stráþökum og gras er notað til einangrunar. Undanfarin ár hafa þeir barist við mikla þurrka og stór hluti búfénaðar þeirra hefur farist. Lífsskilyrði hafa því versnað og eru erfið eins og staðan er í dag.

Í kringum þorpin eru byggðar varnargirðingar úr þyrnum. Margir Maasai karlmenn eiga tvær til fjórar konur. Konurnar sjá alfarið um byggingu húsanna en karlmennirnir um öryggi íbúanna. Karlmennirnir búa í sér húsi og hver eiginkona með sín börn í öðru. Stjórnvöld hófu að úthluta hverri Maasai fjölskyldu smá landskika til ræktunar í von um að stuðla að bættum lífsgæðum þeirra.

Skólakerfið

Skólaárið í Kenýa hefst í janúar. Hvert skólaár skiptist niður í þrjár annir og taka börnin próf eftir hverja önn. Fyrsta önn er frá janúar til mars, önnur önn í maí til júlí og þriðja frá byrjun september fram í miðjan nóvember.

Landið

Kenýa er land í Austur-Afríku með landamæri að Eþíópíu í norðri, Sómalíu í austri, Tansaníu í suðri, Úganda í og Súdan í norðvestri og strönd við Indlandshaf. Höfuðborg landsins er Naíróbí. Miðbaugur liggur í gegnum norðurhluta þess. Landið er að miklu leyti hálent, en láglent við strendur. Höfuðborgin Naíróbí er í 1800 metra hæð. Kenýa er 580.000 ferkílómetrar að stærð.

Íbúar Kenýa eru um 48,6 milljónir manna. Flestir þeirra búa í suðurhluta landsins í grennd við höfuðborgina Naíróbí og við landamæri Úganda hjá Viktoríuvatni. Þar eru góðar jarðir og nægileg úrkoma til að stunda akuryrkju.  Flestir íbúar Kenýa eru smábændur sem stunda sjálfsþurftarbúskap eða hafa ofan af fyrir sér inna  óopinbera geirans í borgunum en aðeins örfá prósenta íbúanna greiða skatt. 99 prósent af Kenýubúum eru af mismunandi þjóðarbrotum blökkumanna og hafa flest þjóðarbrotin sitt eigið tungumál. Til að einfalda þann vanda hefur Svahílí verið gert að ríkismáli. Svahíli er bantúmál sem blandast hefur við smá arabísku og ensku. Kenýa var ensk nýlenda en varð sjálfstætt ríki 1963

Í Kenýa eru um 50 mismunandi þjóðir. Fyrsti forseti landsins var Jomo Kenyatta. Hann var af fjölmennustu þjóðinni kíkújú. Á meðan hann ríkti naut sú þjóð ýmissa forréttinda. Af því hlutust pólistískar óeirðir í landinu. Áður en Kenýa varð sjálfstætt ríki þá ríkti mikið ósætti í samfélaginu en nú eiga þau að starfa saman í einu ríki. Nú á dögum er Kenýa með friðsamlegari löndum í Afríku, þrátt fyrir ýmsa erfiðleika.

Naíróbí er ein hættulegasta höfuðborg heims. Af þremur milljónum íbúa lifir að minnsta kosti helmingur í fátækrahverfum og atvinnuleysi er yfir 70%. Millistéttin virðist engin heldur búa langflestir við ömurleg kjör. Í fátækrahverfunum er atvinnuleysi yfir 90% og HIV tíðnin hækkar stöðugt. Á einum ferkílómetra búa um 3000 manns, skólplækir liggja milli kofaskrifla og rusl hrúgast um allt. Hér gildir frumskógarlögmálið. Hver bjargar sjálfum sér og lifað er fyrir einn dag í einu. Allt er til sölu og meðfram moldarvegum liggja sölubásar með þýfi, skemmdu grænmeti, brotnum diskum og fleiru sem enginn hefur efni á að kaupa. Vændi er líka réttlætanlegt. Afkoman gefur mat handa fjölskyldunni það kvöldið, HIV er vandamál morgundagsins.

Spillingin hefur tröllriðið þjóðfélaginu. Ríkið lofar ókeypis grunnskólamenntun en skólabúningar eru í staðinn dýrir og leiga á skólaborði kostar 2500 krónur á ári. Sólarhringur á ríkisspítalanum kostar 40.000 krónur fyrir fólk sem þénar undir 70 krónum á dag og um tveggja sólarhringa biðröð er til að leggjast inn. Vítahringur vonleysis hefur skapast í samfélaginu, hringur sem erfitt er að rjúfa.