Búrkína fasó

23m

Íbúar í landinu

40%

Eru undir fátæktarmörkum

65%

Eru undir 30 ára

2,5 ár

Meðalfjöldi ára í skóla

61 ár

Lífslíkur við fæðingu

ABC skólinn í Búrkína Fasó

Í september 2008 stofnuðu hjónin Hinrik Þorsteinsson og Guðný Ragnhildur Jónasdóttir ABC Children‘s Aid í Búrkína Fasó og skólinn Ecole ABC de Bobo var settur á fót í borginni Bobo- Dioulasso sem er næststærsta borg Búrkína Fasó með um það bil 1.000.000 íbúa.

Stjórnuðu þau hjónin skóla- og uppbyggingarstarfinu ásamt aðstoðarframkvæmdastjóranum Kadi Bambara.

Árið 2023 tóku svo við hjónin Haraldur Pálsson og Jóhanna Sólrún Norðfjörð en þau hafa unnið mikið uppbyggingastarf á svæðinu á undanförnum árum. Sjá þau nú um að stjórna skóla- og uppbyggingarstarfinu ásamt Kadi. Alls koma að skólastarfinu tæplega 90 starfsmenn sem allir eru innfæddir.

Húsnæðið sem notast var við fyrir skólastarfið fyrstu þrjú árin var fengið að láni og endurbætt til starfsins. Í mars 2011 flutti skólinn inn í nýtt húsnæði sem samanstóð af 6 kennslustofum og hýsti tæplega 400 börn í 1. til 6. bekk. Húnsæði skólans er í stöðugri uppbyggingu og fjölgar nemendum í takt við það. Árið 2026 eru nemendur orðnir 1414 og styður ABC barnahjálp rúmlega 800 börn til náms. Skólinn er staðsettur rétt við fátækrahverfið Quenzeville í útjaðri borgarinnar og koma börnin frá bláfátækum heimilum. Í skólanum fá börnin skólagögn, skólabúning og heita máltíð kl. 12.00. Auk þess er heilsugæsla á staðnum.

Útskrift

Í júní 2014 útskrifaðist fyrsti hópurinn úr grunnskóla, alls 33 börn úr 6. bekk. Unglingaskóli (Secondary school) hefur verið settur á fót og haustið 2014 hófu 33 nemendur nám á fyrsta ári unglingadeilar (7. bekkur í íslensku skólakerfi).

Í janúar árið 2016 hófst tölvukennsla í skólanum. Var það einungis hægt vegna velvildar fyrirtækja og einstaklinga sem hafa í gegnum tíðina stutt ABC með því að gefa tölvur og fylgihluti. Tölvukennslan lyftir náminu á hærra stig og eykur starfsmöguleika nemenda til muna að námi loknu. Starfrækt er starfsmenntadeild fyrir börn sem gengur verr að fóta sig í hefðbundnu bóknámi. Þar er m.a. boðið upp á saumakennslu, nám í bifvélavirkjun og húsgagnasmíði. Einnig er boðið upp á tónlistarkennslu á sama stað. Árið 2022 hófu svo fyrstu nemendurnir nám við háskóla.

ný bygging

Bygging á þriggja hæða framhaldsskóla lauk árið 2017 og miklar framkvæmdir hafa verið á svæðinu þar sem búið er að koma fyrir enn stærri vatnstanki og fleiri sólarsellum bætt við. Aðstaða starfsfólks hefur verið bætt, stærri matsalur verið tekinn í notkun og eldhúsaðstaða bætt til muna. Árið 2018 var byggður leikskóli og árið 2019 hófu 4-5 ára börn skólagöngu sína þar.

Árið 2019 voru byggð stúlkna og drengjaheimili á Líflandi þar sem rekinn er landbúnaðarskóli. Bætt var við nýjum vatnsturni á skólasvæðinu og vatnslagnir lagðar í skólann og á Líflandi. 2020 var bætt við sólarsellum og batterýum og árið 2025 var byggt við framhaldsskólann og tekið í notkun 8 nýjar kennslustofur fyrir eldri bekki grunnskólans og framhaldsskólann ásamt kennarastofu.

Uppbyggingin hefur því verið mjög mikil á svæðinu og nemendum fjölgað mikið og starfsemin aukist verulega.

• Skólaárið er frá byrjun október til júníloka.
• Skólinn í Bobo er rekinn fyrir styrktarfé frá ABC barnahjálp.
• Styrktarféð kemur frá stuðningsaðilum barnanna í skólanum.