Bruni í Nytjamarkaði okkar á Smiðjuvegi

UNGAR KONUR FÁ NÝTT TÆKIFÆRI  Það er mikil gleði hjá okkur í ABC barnahjálp því kennsla er nú formlega hafin að nýju í klæðskeraskólanum okkar í Pakistan! Á myndunum sem okkur bárust frá Pastor Chand má sjá glaðar og áhugasamar ungar konur við saumavélarnar ásamt kennaranum sínum. Þær eru þegar byrjaðar að sauma og taka fyrstu skrefin í að læra nýja iðn sem getur breytt framtíð þeirra. Skólinn er staðsettur í Sheikhupura í Pakistan, þar sem margar fjölskyldur búa við erfiðar aðstæður og hafa takmarkaða möguleika á atvinnu og menntun. Markmið verkefnisins er að veita 15 ungum konum tækifæri til að læra saumaskap og öðlast færni sem getur hjálpað þeim að afla eigin tekna og styðja fjölskyldur sínar. Það er sérstaklega ánægjulegt að sjá hversu mikinn áhuga og metnað nemendurnir sýna strax í upphafi. Nú leitum við að fyrirtæki eða einstaklingum sem hafa áhuga á að styrkja rekstur skólans. Rekstrarkostnaðurinn er um 55.000 krónur á mánuði, en með þeim stuðningi er hægt að veita þessum ungu konum dýrmæta menntun og tækifæri til betri framtíðar. Kannski vilt þú eða þitt fyrirtæki taka þátt í þessu fallega verkefni? Hafðu samband hs@abc.is Saman getum við skapað tækifæri sem breyta lífi!

Á hverju hausti bjóðum við stuðningsaðilum okkar að leggja í jólagjafasjóð ABC Barnahjálpar.

,,Ég hef alltaf litið á þetta sem mikla náð frá Guði” Viðtal við Rita Sanou, fyrrverandi nemanda ABC-skólans í Búrkína Fasó. Jóhanna Sólrún Norðfjörð, stjórnarformaður ABC skólans í Búrkína Fasó, ræddi við Ritu um skólagöngu hennar, minningar frá ABC-skólanum, stuðninginn frá Íslandi og framtíðardrauma hennar. Rita Sanou er 25 ára gömul og hefur lokið bakkalárgráðu í líffræðilegum rannsóknum, gæðatryggingu og gæðaeftirliti. Hún býr í dag hjá móðurbróður sínum ásamt tveimur konum og átta drengjum. Rita var aðeins sjö ára gömul þegar hún hóf skólagöngu sína í ABC-skólanum árið 2008 og var hún ein af fyrstu nemendum skólans. Síðan þá hefur hún gengið í gegnum bæði gleði og sorgir, en stuðningurinn sem hún fékk í gegnum ABC skólann hefur haft mikil áhrif á líf hennar og framtíð. Rita, þegar þú hugsar til baka til áranna þinna í ABC-skólanum, hvað stendur þá helst upp úr í minningunni? „Ég á svo margar góðar minningar frá þessum árum. Ég man sérstaklega eftir mömmu Trédi, eiginkonu Tonton Eli, sem kenndi okkur orð Guðs. Ég man líka vel eftir frímínútunum. Í skólanum var stórt svæði þar sem við sátum saman á mottum, lékum okkur, spjölluðum og áttum góðar stundir í samfélagi hvert við annað. Þetta voru mjög ánægjulegar stundir. Það sem ég sakna mest eru leikirnir, samtölin og stundirnar þegar við hlustuðum saman á orð Guðs á hverju fimmtudagskvöldi í skólagarðinum. Ég man líka vel eftir ferðunum sem voru skipulagðar fyrir okkur með GBS, Biblíuhópi skólans. Í þessum ferðum lærðum við að skilja margt betur varðandi orð Guðs, en við áttum líka góðar stundir saman þar sem við gátum slakað á og notið samfélagsins. Ég sakna þessara stunda mjög mikið.  Allir kennararnir og allt starfsfólk ABC höfðu jákvæð áhrif á mig. Ég lærði eitthvað af hverju og einu þeirra. Ég man þó sérstaklega eftir mömmu Naomie. Hún útbjó svo marga dýrindisrétti fyrir okkur. Ég man líka eftir öllum góðu ráðunum sem hún gaf mér og blessunarorðunum sem hún talaði yfir mig í hvert sinn sem við vorum saman.“

Í júní var ekið á dreng úr ABC-starfinu í Búrkína Fasó, ökumaðurinn var ölvaður. Myndir sem teknar voru eftir slysið sýndu greinileg beinbrot, en ekkert var gert og fékk hann ekki þá meðferð sem hann þurfti. Drengurinn heitir Hamido og hefur farið í gegnum ABC skólann og stundar núna háskólanám. Þegar Jóhanna og Haraldur, sem fara fyrir ABC-skólanum, komu til Búrkína Fasó núna í september lok sáu þau hversu illa hann var farinn og ákváðu að leita frekari aðstoðar. Ný myndataka staðfesti að aðgerð væri nauðsynleg. Haraldur fór með honum á Centre Médical La Grâce, sjúkrahús í útjaðri Bobo-Dioulasso sem rekið er af sænsku hjálparsamtökunum Västafrikahjälpen. Kostnaður við aðgerðina var um 200 þúsund íslenskar krónur. Hjálparsjóður ABC barnahjálpar, styrktaraðili drengsins og fleiri eru að leggja sitt af mörkum til að standa straum af kostnaðinum. Aðgerðin hefur nú farið fram og árangurinn er gleðilegur. Drengnum líður mun betur og er þegar farinn að geta stigið í fótinn á ný. Fyrsta beinbrots myndin var tekin í júní og næsta sýnir beinbrotið núna í byrjum október. En þar sést hvernig lærleggur hefur farið alveg í sundur og gengið niður meðfram lærvöðvanum. Ef ekkert hefði verið að gert hefði hann sennilega misst fótinn. Við erum innilega þakklát öllum sem hafa lagt þessari mikilvægu hjálp lið. Enn er hægt að taka þátt og hjálpa okkur að standa straum af kostnaði við aðgerðina með því að styrkja Hjálparsjóð ABC Barnahjálpar, hér er linkur á sjóðinn.

ABC Barnahjálp hefur fjármagnað kaup á sérútbúnum hjólastól fyrir Bilal Asif, nemanda við Rasta Foundation Brick Kiln School í Pakistan. Hingað til hefur verið erfitt fyrir Bilal að komast í skólann þar sem hann hefur þurft að reiða sig á að aðrir beri hann milli staða. Nýi hjólastóllinn mun því hafa mikil áhrif á daglegt líf hans, auðvelda honum að komast til og frá skóla og veita honum aukið sjálfstæði og öryggi. Bilal er afar ánægður með nýja hjólastólinn og þakklátur fyrir stuðninginn.  Það er sérstaklega ánægjulegt að sjá hvernig stuðningur sem þessi getur haft bein og raunveruleg áhrif á líf barns – og um leið tryggt betra aðgengi þess að menntun. Við þökkum öllum stuðningsaðilum ABC Barnahjálpar sem gera okkur kleift að veita börnum eins og Bilal stuðning þegar þörfin er mest.

FRÁBÆR ÁRANGUR UM HELGINA Reykjavíkurmaraþon Íslandsbanka fór fram laugardaginn 22. ágúst og átti ABC Barnahjálp frábæran hóp hlaupara sem lagði starfinu lið. Alls söfnuðust 3.864.811 krónur frá 336 aðilum til styrktar ABC barnastarfi. Sérstaklega ber að nefna Guðjón Norðfjörð, sem hljóp heilt maraþon og safnaði 2.828.745 kr. Söfnun hans tengist uppbyggingu nýrrar heilbrigðisþjónustu við ABC-skólann í Bobo-Dioulasso, sem mun bera nafnið Arna Heilbrigðisþjónusta, til minningar um eiginkonu hans, Örnu Hansen. Synir þeirra, Nökkvi og Ísak, hlupu einnig ásamt vini sínum Össa til stuðnings verkefninu. Fleiri lögðu ABC lið í hlaupinu, þar á meðal Sigurleif Sigurðardóttir, Ívar Ísak Guðjónsson, Jón Sverrir Friðriksson og Milla Rautiainen, auk annarra sem völdu að hlaupa fyrir ABC Barnahjálp. Heilsugæslan Arna mun þjóna bæði börnum ABC-skólans og íbúum nærliggjandi samfélags og bæta aðgengi þeirra að nauðsynlegri heilbrigðisþjónustu. Við færum öllum hlaupurunum okkar, þeim 336 aðilum sem styrktu söfnunina og öllum þeim sem hvöttu hlauparana áfram okkar innilegustu þakkir. Hvert skref og hvert áheit skiptir máli.

Guðjón Norðfjörð hyggst hlaupa heilt maraþon til styrktar uppbyggingu heilbrigðisþjónustu við ABC-skólann í Bobo-Dioulasso í Búrkína Fasó. Þjónustan mun nýtast bæði börnum í skólanum og íbúum hverfisins. Uppbyggingin er þegar hafin og segir Guðjón tæpar tvær milljónir króna hafa safnast. Áætlað er að um sjö milljónir króna þurfi til að koma aðstöðunni upp en að því loknu þarf að finna styrktaraðila til að styðja við reksturinn. Heilbrigðisþjónustan mun bera nafnið Arna Heilbrigðisþjónusta, til minningar um Örnu Hansen, eiginkonu Guðjóns. Mikil hlaupafjölskylda Í samtali við mbl.is segist Guðjón hafa stundað langhlaup í mörg ár. Hann hefur hlaupið nokkur heil maraþon og mörg hálfmaraþon auk þess að hafa lokið nokkrum hálfum járnkörlum og tveimur heilum. Í júlí hljóp hann jafnframt 55 kílómetra Laugavegshlaupið og þá í þriðja skiptið. Langhlaup og þríþrautir hafa raunar lengi verið sameiginlegt áhugamál hjá fjölskyldunni. Árið 2022 tók fjölskyldan þátt í járnkarli á Ítalíu þar sem Guðjón, börn hans Ísak, Nökkvi og Ísold og tengdasonurinn Sveinn Þráinn Guðmundsson luku heilum járnkarli og Arna Hansen, eiginkona Guðjóns, lauk hálfum.

Með 15 ára stuðningi ABC barnahjálpar lauk Kenneth BSc í afbrotafræði og stóðst löggildingarpróf. Nú stefnir hann á starf hjá Tri-Bureau á Filippseyjum.

Með stuðningi ABC barnahjálpar lauk Stephenson háskólanámi með heiðri og er nú stjórnandi hjá McDonald's. Lestu innblásna sögu hans um þrautseigju.